Улетку ў чытацкага клуба «Кантэкст» здарыліся вакацыі, перазагрузка. За гэты час удзельнікі прачыталі шмат кніг і з задавальненнем падзяліліся сваімі ўражаннямі і эмоцыямі на вераснёўскай сустрэчы «Кніжнае лета: размова аб прачытаным».

Як аказалася, большасць чыталі беларускіх аўтараў — як класікаў (Іван Шамякін, Алесь Адамовіч, Васіль Быкаў, Майсей Кульбак і інш.), так і сучаснікаў (Наталля Беланожка, Алеся Кузняцова і інш.). Хтосьці захапіўся іранічнымі, дасціпнымі кнігамі (Саслан Пліеў «Иногда нам снятся старые собаки»; Яцэк Галіньскі «Пани Зофья. У вас колесо отвалилось», «Пани Зофья. Вы всё перепутали» і інш.) і атрымалі ад іх шмат добрых эмоцый.

Для кагосьці лета — гэта чытанне дзіцячых твораў («Когда отдыхают ангелы» Марыны Аромштам). Удзельніца сустрэчы зачытала ўрыўкі з тэксту, якія яе асабліва закранулі, і ўсе з задавальненнем слухалі.

Навінку папулярнага нямецкага аўтара Берхарда Шлінка «Внучка» прачытала чатыры ўдзельнікі клуба і водгукі аказаліся супярэчлівымі. Камусьці гістарычная частка была вельмі цікавая, іншыя з задавальненнем сачылі за сямейнай лініяй. Але ўсе былі аднадушныя, што кніга змястоўная, філасофская і глыбокая. Многім спадабаўся яшчэ адзін нямецкі аўтар — Даніэль Шпек, і яго гістарычныя раманы «Piccola Сицилия», «Bella Германия» і «Улица Яффо».

Моцнае ўражанне зрабіла кніга «Гонки на мокром асфальте» Гарта Стайна. Гэта кранальная гісторыя, расказаная сабакам. Кніга пра лабрадора і яго гаспадара гоншчыка, пра іх сям'ю, узлёты і падзенні. Па меркаванні чытача, гэтая гісторыя натхняе на перамогі над сабой.

Фрэдрык Бакман — па-ранейшаму адзін з самых чытаемых шведскіх аўтараў у ўдзельнікаў нашага клуба. Яго кнігі аб людзях рознага ўзросту і прафесій і кранальныя, і смешныя адначасова. Адна чытачка з радасцю падзялілася ўражаннем аб апошняй кнізе з трылогіі аб хакеістах «После бури». Многія сышліся на думцы, што гэта вельмі таленавіты аўтар, які піша з лёгкай іроніяй, і, мяркуючы па ўсім, яшчэ і добры чалавек.

Прагучала шмат цікавых водгукаў аб творчасці Рыгора Кановіча («Улыбнись нам, Господи», «Козлёнок за два гроша» «Продавец снов»). Яго творы павучальныя і прымушаюць задумацца аб людскіх — сваіх і чужых — учынках.

Закранулі і кнігі нон-фікшн («XX-мозг. Новейшие открытия, которые помогут женщинам укрепить когнитивное здоровье, поддерживать гормональный баланс и предупредить болезнь Альцгеймера» Лайзы Масконі), кнігі з серыі «ЖЗЛ» («Бестужев-Марлинский» Голубава). Распавесці пра ўсё немагчыма. Далучайцеся да клуба і адкрывайце разам з намі новыя кніжныя гарызонты!

Аддзел абанемента

+375(162) 57-48-09