З 24 верасня па 20 кастрычніка 2025 г. у аддзеле перыядычных выданняў Брэсцкай абласной бібліятэкі імя М. Горкага экспануецца выстава «У гасцях у свету», прымеркаваная да Міжнароднага дня турызму.

Дзень турызму быў заснаваны ў 1979 годзе падчас асамблеі UNWTO. Дата абрана не выпадкова — 27 верасня 1970 года Сусветная турыстычная арганізацыя прыняла свой Статут, якім яна кіруецца і дагэтуль. Мэта свята — прыцягнуць увагу да турызму як да магутнага інструмента абмену культурным вопытам і наладжвання міжнародных сувязей. У Рэспубліку Беларусь свята прыйшло яшчэ ў часы СССР, дзе яго ўпершыню адзначылі ў 1983 годзе.

За апошнія паўстагоддзя турызм стаў адным з найбольш хуткарослых і найбольш важных сектараў эканомікі ў свеце. У турызме заняты кожны дзясяты чалавек на Зямлі. Гэтая сфера забяспечвае сродкамі для існавання сотні мільёнаў людзей. Штогод абіраецца дэвіз свята, якое задае тэму мерапрыемстваў, што разгортваюцца ў гэты дзень. Дэвіз Сусветнага дня турызму ў 2025 годзе — «Турызм і ўстойлівая трансфармацыя». Гэты дэвіз падкрэслівае пераўтваральны патэнцыял турызму і неабходнасць пераходу да больш устойлівых і інавацыйных метадаў вядзення турыстычнага бізнесу, якія прыносяць карысць мясцовым супольнасцям і захоўваюць прыроду.

На выставе прадстаўлены публікацыі з перыядычных выданняў, якія змяшчаюць інфармацыю аб турыстычнай індустрыі на сучасным этапе, аб формах і відах турызму, парады і ідэі для падарожнікаў-пачаткоўцаў.

Экспазіцыя падрыхтавана па матэрыялах часопісаў «Беларуская думка», «Вокруг света», «Вояж», «Гео», «Планета», «Кудесница», «Туризм и гостеприимство», «Новая экономика», «Гермес», «Алеся».

Аддзел перыядычных выданняў

+375 162 57 48 39