З 10 чэрвеня 2022 г. у аддзеле літаратуры па мастацтве Брэсцкай абласной бібліятэкі імя М. Горкага дзейнічае выстава «Парадоксы Стравинского», прысвечаная 140-годдзю з дня нараджэння вялікага рускага кампазітара, выканаўцы і дырыжора, яркага прадстаўніка мадэрнізму ў музыцы. Ігар Фёдаравіч Стравінскі працаваў практычна ва ўсіх сучасных яму жанрах. У яго творчай спадчыне оперы, балеты, сімфоніі, кантаты і араторыі, канцэрты, камерная інструментальная і вакальная музыка. Творы Стравінскага глыбока прасякнуты рускім духам — гэта здабыла кампазітару неверагодную папулярнасць за мяжой і шчырую любоў у Расіі.

Позні этап творчасці Стравінскага характарызуецца перавагай у ёй духоўнай тэматыкі. Кульмінацыяй творчасці з’яўляецца «Реквием» («Заупокойные песнопения»), гэты апошні шэдэўр Стравінскі напісаў у 84-гадовым узросце, калі быў цяжка хворы і прадчуваў свой хуткі адыход. У экспазіцыі прадстаўлены кнігі, паштоўкі, часопісы, нотныя зборнікі, вінілавыя пласцінкі і кампакт-дыскі. Цікавасць уяўляе кніга К. Ю. Стравінскай, роднай пляменніцы кампазітара, «О И. Ф. Стравинском и его близких» (Ленінград, 1978). У аснову кнігі пакладзены дзённікі сустрэч з кампазітарам у апошняе дзесяцігоддзе яго жыцця, а таксама перапіска з ім і яго блізкімі. Кніга І. Стравінскага «Хроника моей жизни» (Ленінград, 1963) — аўтабіяграфія кампазітара ахоплівае перыяд да 1934 г. Манаграфія Б. Ярустоўскага «Игорь Стравинский» (Ленінград, 1982) асвятляе асноўныя этапы творчасці майстра. Першыя чатыры раздзелы апісваюць рускі, швейцарскі, парыжскі і амерыканскі перыяды жыцця Стравінскага. Пяты раздзел кнігі прысвечаны агульным праблемам стылістыкі музычных твораў.

Запрашаем усіх жадаючых наведаць экспазіцыю, якая будзе адкрыта для прагляду да канца чэрвеня.

Аддзел літаратуры па мастацтве

+375 162 57 48 78