2023 год аб'яўлены ў Беларусі Годам міру і стварэння. 20 чэрвеня 2023 г. у рамках культурна-асветніцкага праекта Брэсцкай абласной бібліятэкі «Через книгу к миру и созиданию» галоўны бібліятэкар аддзела абанемента Н. А. Равенка правяла агляд кніжнай выставы «Тема мира и согласия в художественной литературе» для Брэсцкай абласной калегіі адвакатаў.

Выстава складалася з трох раздзелаў і ўключала каля 200 выданняў з фонду аддзела абанемента.

Першы раздзел «Сохраняя память — сохраняем мир» знаёміць як з класічнай літаратурай, так і з сучаснымі пісьменнікамі. Жыхарам Брэстчыны асабліва важна захаваць памяць пра мінулае сваёй малой радзімы. У гэтым дапамогуць кнігі аўтараў-землякоў: «Сяліба» Анатоля Брытуна, «Слодыч і атрута» Зінаіды Дудзюк, «Вайна» і «Пасля вайны» Уладзіміра Гніламёдава.

Цяжкі пасляваенны час апісаны ў кнігах «Детство 45–53: а завтра будет счастье» Людмілы Уліцкай, «Уроки французского» Валянціна Распуціна, «Тень каравеллы» Уладзіслава Крапівіна, «Ночевала тучка золотая» Анатоля Прыстаўкіна.

Пра лёс чалавека ў кругавароце гістарычных падзей распавядаецца ў творах Іллі Эрэнбурга («Люди, годы, жизнь»), Дзмітрыя Ліхачова («Время сближения»), Данііла Граніна («Причуды памяти»), Зоі Багуслаўскай («Предсказание»), Ліліяны Лунгіной («Подстрочник»), Аляксандра Чудакова («Ложится мгла на старые ступени») і іншых пісьменнікаў.

Хочацца асобна вылучыць сямейныя сагі — гісторыі жыцця цэлых пакаленняў, іх цяжкасцяў і радасцяў, таямніц і традыцый, расколаў і ўз'яднанняў — Наталлі Несцеравай «Жребий праведных грешниц», Вацлава Міхальскага «Весна в Карфагене», Ірыны Багданавай «Три Анны», Марыны Сцяпновай «Женщины Лазаря».

Калі заканчваюцца войны, надыходзіць час міру і стварэння. Раздзел «Созидание» прысвечаны працоўным будням у самых розных сферах жыццядзейнасці чалавека. Гэта і прафесія ўрача, лепшых з якіх называюць другімі пасля Бога (Фёдар Вуглоў «Будни хирурга», Абрахам Вергезэ «Рассечение Стоуна»); прафесія следчага (Мікалай Чаргінец «За секунду до выстрела», «Вам задание»; Уладзімір Чванаў «По следам “Чёрной кошки”»; Аркадзь і Георгій Вайнеры «Место встречи изменить нельзя») і многія іншыя прафесіі.

Трэці раздзел «Время мира — время жизни» прысвечаны творам аб простых жыццёвых радасцях — сям'і, сямейных традыцыях, духоўнасці. У ім прадстаўлены кнігі Наталлі Ігнаценкі і Аляксандра Радзькова «Маленькие истории большой семьи», Эльчына Сафарлі «Рецепты счастья», і інш.

Прыемна адзначыць, што многія слухачы агляду сталі чытачамі бібліятэкі і ўзялі кнігі, якія зацікавілі, каб прачытаць іх дома.

Аддзел абанемента

+375 162 57 48 09