«Ян Чачот — прадвеснік беларускага Адраджэння»

    У 2016 г. з нагоды 220-гадовага юбілею з дня нараджэння Яна Чачота, у гонар слыннага паэта Баранавіцкай зямлі, Баранавіцкая цэнтральная раённая бібліятэка імя Я. Чачота правяла краязнаўчую акцыю «Напішам ліст Чачоту разам», вынікам якой стала складанне фальклорнага сшытка «Яну з Мышы. Фальклор у запісах жыхароў Баранавіцкага раёна».
    Права зрабіць запіс у фальклорным сшытку меў кожны, хто памятае ад продкаў паданні, легенды, прыказкі, прымаўкі, загадкі, казкі, народныя песні, калыханкі, абрады, трапныя выразы і асобныя адметныя словы. Колькасць запісаў была не абмежавана. Пасля паведамлення неабходна было пазначыць дату, сваё прозвішча, імя, імя па бацьку, месца жыхарства і прыгадаць, ад каго і дзе пачулі тое, што запісалі.
    Сёння сшытак змяшчае каля 25 запісаў і будзе далей папаўняцца.
    Галоўная мэта фальклорнага сшытка — захаванне мінулага для будучыні.

    Пастаноўка па баладзе Яна Чачота «Мышанка» ў выкананні народнага тэатра «На Мышанцы» УА «Навамышскі дзяржаўны прафесійны ліцэй сельскагаспадарчай вытворчасці». Здымкі вяліся на сцэне УА «Навамышскі дзяржаўны прафесійны ліцэй сельскагаспадарчай вытворчасці». Артысты — навучэнцы ліцэя. Рэжысер-пастаноўшчык — Станіслаў Пшэўлоцкі. Запіс зроблены ў 2017 г. Пастаноўка па сённяшні час знаходзіцца ў рэпертуары народнага тэатра.

«Песні з-над Нёмана і Дзвіны‎»‎
на тэксты Яна Чачота

    Сярод паэтаў, да якіх звяртаўся ў сваёй творчасці знакаміты кампазітар Станіслаў Манюшка, важнае месца належыць збіральнікам і знаўцам беларускага фальклору — Яну Чачоту, Уладзіславу Сыракомлю, Яну Карловічу. Кампазітара прываблівала песенная аснова іх вершаў, фальклорнасць і прастата тэкстаў.
    Ніхто з паэтаў не быў такім частым аўтарам вершаў да яго песень, як Ян Чачот. Манюшка стварыў музыку на словы беларускіх народных песень, перакладзеных паэтам на польскую мову і змешчаных у зборніках «Сялянскія песенькі» і «Песенькі з-над Нёмана», а адным з самых вядомых з’яўляецца твор «Праснічка», які часта перакладаецца для інструментальнага выканання.

Выстава Нацыянальнага гістарычнага архіва Беларусі

    Да 225-годдзя з дня нараджэння Яна Чачота на афіцыйным сайце Нацыянальнага гістарычнага архіва Беларусі размешчана віртуальная выстава, прысвечаная паэту. Яна складаецца з чатырох частак. Акрамя агульнай інфармацыі пра пісьменніка прадстаўлена вялікая колькасць алічбаваных архіўных дакументаў, звязаных з жыццём і дзейнасцю Яна Чачота і яго сваякоў.
    У архіўным фондзе «Мінскі дваранскі дэпутацкі сход» захоўваецца справа аб дваранскім паходжанні роду Чачотаў герба «Астоя», у якой ёсць падрабязныя звесткі пра родных і сваякоў паэта, аўтэнтычныя аўтографы Яна Чачота, а таксама пратаколы паседжанняў Мінскага і Літоўскага дваранскіх дэпутацкіх сходаў аб прызнанні ў дваранскай годнасці роду Чачотаў, арыгінальныя генеалагічныя табліцы. А ў метрычных кнігах, што прадстаўлены на выставе, ёсць запісы аб нараджэнні і хрышчэнні будучых бацькоў, сясцёр і брата Яна Чачота.