3 лютага 2025 г. ў сектары рэдкай кнігі Брэсцкай абласной бібліятэкі імя М. Горкага для навучэнцаў Брэсцкага дзяржаўнага каледжа прыборабудавання праведзена музейна-бібліятэчны занятак «Национальный символ Беларуси: открываем для себя Беловежскую пущу».

У цэнтры ўвагі мерапрыемства была кніга Георгія Карцова «Беловежская пуща» — сапраўдная бібліяфільская рэдкасць! Гэты раскошны фаліянт выдаваўся ў якасці падарунка для высокапастаўленых асоб у 1903 годзе! Тыраж выдання — 300 экзэмпляраў. У продаж кніга не паступала!

Аўтар абагульніў вядомыя і сталыя даступнымі толькі яму звесткі пра Белавежскую пушчу, пачынаючы са старажытных часоў да пачатку XX стагоддзя, і стварыў унікальны летапіс вялікага лесу. Г. Карцоў расказвае пра гісторыю, фаўну і флору Белавежскай пушчы, з веданнем справы апісвае найвышэйшыя паляванні, якія праходзілі тут. Паляванні мелі важнае палітычнае значэнне, так як на іх запрашаліся самыя высокапастаўленыя асобы з розных еўрапейскіх краін, і паляванні з'яўляліся па сутнасці нефармальнымі «самітамі».

У кнізе прадстаўлены шэраг рэдкіх фатаграфій, на якіх адлюстраваны члены імператарскай сям'і на паляванні.

Занятак уключаў апавяданне, прэзентацыю, віктарыну пра старажытны лес. Па традыцыі пераможцу ў віктарыне была прадастаўлена магчымасць сфатаграфавацца з рарытэтам з фонду сектара рэдкай кнігі — сёння гэта праца Г. Карцова «Беловежская пуща» (1903).

Сектар рэдкай кнігі

+375 162 57 48 30