Брэсцкая абласная бібліятэка імя М. Горкага |
|
Брэсцкая абласная бібліятэка імя М. Горкага |
|
Цыкл кнігазнаўчых сустрэч
«Брэсцкая Біблія — шэдэўр беларускага Адраджэння»
У аддзеле рэдкай кнігі Брэсцкай абласной бібліятэкі імя М. Горкага адноўлены цыкл кнігазнаўчых сустрэч «Брэсцкая Біблія — шэдэўр беларускага Адраджэння», які складаецца з чатырох частак. У лютым прайшлі заняткі па першай тэме «Рэфармацыя ў ВКЛ і Брэсцкая Біблія». У верасні адбыўся другі этап цыклу «Брэсцкая Біблія — еўрапейскі праект Мікалая Радзівіла Чорнага». Пасля агляднай экскурсіі-знаёмства з бібліятэкай прэзентацыя была праведзена для навучэнцаў Брэсцкага дзяржаўнага прафесійна-тэхнічнага каледжа прыборабудавання.
У ходзе мерапрыемства прысутныя даведаліся як пра Мікалая Радзівіла Чорнага, канцлера Вялікага Княства Літоўскага, віленскага ваяводу і брэсцкага старасту, так і пра Брэсцкую Біблію, якая была выдадзена па яго ініцыятыве і на яго сродкі ў 1563 г. у Брэсцкай друкарні (першай на тэрыторыі сучаснай Беларусі). Таму Брэсцкая Біблія вядома ў свеце і як Радзівілаўская. Гэта першае пратэстанцкае выданне Бібліі на польскай мове. Сучасныя даследчыкі кажуць пра вялікі наклад кнігі — да 1 тыс. экз.
Такі наклад Брэсцкай Бібліі быў разлічаны на тое, каб выданне трапіла ў зборы кальвіністаў ВКЛ і за яго межамі, а таксама ў іншыя важныя інтэлектуальныя цэнтры Еўропы. Мікалай Радзівіл Чорны садзейнічаў шырокаму распаўсюджванню Брэсцкай Бібліі. Ён адсылае сваю працу імператарскаму сыну ў Вену (які нечакана становіцца імператарам; гаворка ідзе пра Максіміліяна II), герцагу Альбрэхту ў Кёнігсберг, і праз свайго сына прынцу Вюртэмбергскаму, і яшчэ, як можна здагадацца, іншым уплывовым людзям.
Брэсцкая Біблія — адно з самых прыгожых, самых каштоўных і самых вялікіх выданняў XVI–XVIII стст. у ВКЛ. Беларускія і замежныя даследчыкі называюць яе шэдэўрам паліграфічнага мастацтва таго часу. Гэтая кніга на стагоддзі праславіла месца свайго выдання і тых людзей, якія мелі дачыненне да яе з’яўлення на свет.
Цыкл будзе працягнуты ў кастрычніку новай тэмай «Брэст — горад Бібліі».
Казакова Віялена Віяленаўна,
бібліёграф аддзела рэдкай кнігі
Кантактны тэлефон: +375 162 57 48 30