Брэсцкая абласная бібліятэка імя М. Горкага |
|
Брэсцкая абласная бібліятэка імя М. Горкага |
|
27 верасня ў аддзеле літаратуры для дзяцей і юнацтва Брэсцкай абласной бібліятэкі імя М. Горкага адбылося падвядзенне вынікаў конкурсу летняга чытання 2020 года «Літаратурны пікнік».
Удзельнікі конкурсу прадставілі ў розных намінацыях кнігі, якія прачыталі падчас летніх канікул.
Намінацыя «Я — мастак» як заўсёды аказалася самай прывабнай. Багдан Раманюк (СШ № 9, 2-і кл.) прадставіў маляўнічую ілюстрацыю да кнігі «Приключения воздухоплавателей» вядомага французскага пісьменніка Луі Бусенара. У малюнак дырыжабля на сваё меркаванне ён дадаў шмат неабходных тэхнічных элементаў і падрабязна растлумачыў, як яны працуюць. Цімафей Сабко (СШ № 15, 8-ы кл.), пачынаючы мастак, прынёс цэлы альбом малюнкаў, таму што кожная прачытаная і ўпадабаная кніга выклікае ў яго жаданне яе праілюстраваць. Прадставіла і зрабіла агляд цэлай серыі кніг маладой англійскай пісьменніцы Мішэль Мізра «Школа ангелов» Кацярына Вакуліч (СШ № 32, 3-і кл.).
Паняцце «мастак» вельмі шматграннае, дзе пачуцці і эмоцыі можна выяўляць не толькі з дапамогай алоўка і пэндзля, але і розных іншых прадметаў. Сапраўдным майстрам аплікацыі з саломкі можна назваць Ульяну Гарошка (СШ № 20, 7-ы кл.). Некалькі гадоў яна наведвае аб’яднанне «Каласок» пры Цэнтры дадатковай адукацыі дзяцей і моладзі. У апошні час яна захапілася чытаннем кніг пра прыроду нашай краіны і прадэманстравала нам вырабы і аплікацыі з саломкі, прысвечаныя Белавежскай пушчы.
Калі чалавек з самага ранняга дзяцінства чытае шмат, то ўжо да 11 гадоў у яго калекцыі можа з’явіцца не адзін твор уласнага сачынення. Пра гэта распавяла ў сваім відэароліку Рэзнікава Сафія (гімназія № 5, 6-ы кл.), выбраўшы намінацыю «Я — паэт». Яна прачытала некалькі сваіх новых вершаў пра восень і любімы горад Брэст.
Не першы раз у намінацыі «Я — пісьменнік» удзельнічае Такарчук Лізавета (гімназія № 1, 7-ы кл.). У гэтым годзе яна распавяла пра тое, як прыдумала і напісала сваё новае апавяданне «Гарри Поттер и его детство» — пачатак да папулярнай серыі кніг Д. Роўлінг.
Леў Такарчук (СШ № 3, 2-і кл.), нягледзячы на зусім юны ўзрост, вельмі дапытлівы чалавек, аматар ствараць невялікія маляўнічыя брашуры на розныя тэмы. Ён прыдумаў сваю намінацыю конкурсу «Я — выдавец-укладальнік» і прадставіў у ёй адну са сваіх апошніх прац «Атлас мира».
Вельмі папулярнай у гэтым годзе стала намінацыя «Я — кніжны блогер». Расказалі ў сваіх відэароліках аб любімых кнігах і парэкамендавалі іх іншым чытачам Ксенія (СШ № 3, 1-ы кл.) і Вераніка Дзенісовіч (СШ № 3, 5-ы кл.). А пастаянныя ўдзельнікі конкурсу Глеб (гімназія № 3, 7-ы кл.) і Паліна Гадуйка парадавалі ўсіх прысутных чарговым прафесійным буктрэйлерам на «вясёлы» падручнік І. Гаруновай і А. Лісачэнкі «Котохимия».
З вялікай адказнасцю да выбару намінацыі «Я — крытык» падышоў адзін з самых актыўных чытачоў аддзела Мікалай Дыякоўскі (гімназія № 1, 9-ы кл.). У 15 гадоў яго ўжо можна назваць чытачом са стажам, які мае меркаванне і свой асаблівы погляд на праблемы і напрамкі дзіцячай і падлеткавай літаратуры. На конкурс ён прадставіў артыкул, у якім прааналізаваў творчасць аднаго з самых папулярных у юных чытачоў сучасных пісьменнікаў Эдуарда Веркіна і падзяліўся ўражаннямі аб серыі яго кніг «Хроника Страны Мечты».
Па завяршэнні мерапрыемства ўсе дзеці атрымалі сертыфікаты ўдзельніка конкурсу і памятныя прызы.
Таццяна Уладзіміраўна Грышчук,
гал. бібліятэкар аддзела літаратуры для дзяцей і юнацтва
Кантактны тэлефон: +375 162 59 43 36