22–25 мая 2018 г. адбылася IV Міжнародная навукова-практычная канферэнцыя «Берасцейскія кнігазборы: праблемы і перспектывы даследавання», арганізатарам якой выступіла УК «Абласная бібліятэка імя М. Горкага» пры падтрымцы галоўнага ўпраўлення ідэалагічнай работы, культуры і па справах моладзі Брэсцкага аблвыканкама.

22 мая ў рамках канферэнцыі прайшла прэзентацыя кніг прафесара кафедры фізікі, кандыдата фізіка-матэматычных навук, дацэнта Брэсцкага дзяржаўнага тэхнічнага ўніверсітэта А. А. Гладышчука «Замак Берасцейскі» (Кн.1, 2; Гродна, 2017–2018).

23 мая ў круглай зале гарвыканкама адбылося ўрачыстае адкрыццё канферэнцыі, пленарнае пасяджэнне і прэзентацыя кнігі В. В. Мароза «Драўляныя сакральныя помнікі Берасцейшчыны: нарысы гісторыі, археалогіі і культуры» (Мінск, 2018). У гонар дзесяцігоддзя з часу адкрыцця праекта адбылася цырымонія ўзнагароджвання ўдзельнікаў канферэнцыі знакам «10 гадоў Берасцейскім кнігазборам», а таксама былі падпісаны «Пагадненні аб супрацоўніцтве…» Брэсцкай абласной бібліятэкі імя М. Горкага з Ваяводскай публічнай бібліятэкай імя І. Лапацінскага (Люблін, Польшча) і Цэнтральным дзяржаўным архівам г. Санкт-Пецярбурга (Расія). На пасяджэнні былі агучаны даклады А. А. Сушы, намесніка дырэктара Нацыянальнай бібліятэкі Беларусі; А. А. Гладышчука, прафесара кафедры фізікі, кандыдата фізіка-матэматычных навук, дацэнта Брэсцкага дзяржаўнага тэхнічнага ўніверсітэта; Цімашэнкі Л. У., дэкана гістарычнага факультэта Драгобыцкага дзяржаўнага педагагічнага ўніверсітэта імя І. Франка і інш.

Падчас канферэнцыі працавала пяць секцый:

· Брэст: 1000 гадоў гісторыі (XVI–XVIII стст.);

· Брэст: 1000 гадоў гісторыі (XIX–XX стст.);

· Брэстчына гістарычная (XVI–XVIII стст.);

· Брэстчына гістарычная (XIX–XX стст.);

· Кнігі і кніжнасць у кантэксце часу.

24 мая для ўдзельнікаў канферэнцыі была арганізавана экскурсія «Сакральныя помнікі Берасцейшчыны», у ходзе якой на чале з аўтарам кнігі «Драўляныя сакральныя помнікі Берасцейшчыны: нарысы гісторыі, археалогіі і культуры» В. В. Марозам усе жадаючыя наведалі цэрквы Брэсцкай вобласці, якія былі пабудаваны ў XVI–XVII стст., захаваліся і выконваюць свае функцыі і сёння: Царква Св. Параскевы Сербскай (XVI ст.) у в. Збірогі Брэсцкага р-на; Царква Св. Мікіты (XVI ст.) у в. Здзітава Жабінкаўскага р-на; Царква Св. Міхаіла (XVII ст.) у в. Сцяпанкі Жабінкаўскага р-на; Царква Св. Параскевы ( XVII ст.) у в. Опаль Іванаўскага р-на; Свята-Троіцкая Царква у в. Бездзеж Драгічынскага р-на. Напрыканцы падарожжа адбылася экскурсія ў музей «Бездзежскі фартушок» (в. Бездзеж), падведзены вынікі работы канферэнцыі, адбылося яе закрыццё.