Брэсцкая абласная бібліятэка імя М. Горкага |
|
Брэсцкая абласная бібліятэка імя М. Горкага |
|
Метадычнай дзейнасці рэгіянальных публічных бібліятэк быў прысвечаны міжрэгіянальны круглы стол, які прайшоў 19–20 жніўня 2021 г. на базе ДУК «Баранавіцкая раённая цэнтралізаваная бібліятэчная сістэма». Удзел у працы круглага стала бралі дырэктары бібліятэчных сістэм Брэсцкай вобласці і загадчыкі аддзелаў бібліятэчнага маркетынгу цэнтральных гарадскіх і раённых бібліятэк.
З прывітальнымі словамі да ўдзельнікаў семінара звярнуліся: Л. А. Свідуновіч, начальнік аддзела па каардынацыі дзейнасці арганізацый культуры ўпраўлення культуры Брэсцкага аблвыканкама, М. М. Барысевіч, нам. старшыні Баранавіцкага райвыканкама, А. А. Шчэрба, начальнік аддзела ідэалагічнай работы, культуры і па справах моладзі Баранавіцкага райвыканкама, А. Я. Стрыжэвіч, дырэктар Брэсцкай абласной бібліятэкі імя М. Горкага.
Аб метадычным суправаджэнні дзейнасці публічных бібліятэк Рэспублікі Беларусь на сучасным этапе распавяла заг. навукова-даследчага аддзела бібліятэказнаўства Нацыянальнай бібліятэкі Беларусі (НББ) М. Г. Пшыбытка. Асноўныя аспекты распрацоўкі і ўвасаблення сацыякультурных і навуковых праектаў раскрыла ў сваім выступленні заг. сектара навукова-праектнай работы НББ Т. А. Сапега. Вопытам арганізацыі метадычнай службы ў публічных бібліятэках Віцебскай вобласці падзялілася нам. дырэктара па бібліятэчнай рабоце Віцебскай абласной бібліятэкі імя У. І. Леніна В. М. Камендантава.
Спецыялісты Брэсцкай абласной бібліятэкі пазнаёмілі прысутных з прафесійнымі рэсурсамі па метадычнай дзейнасці, вопытам работы абласной бібліятэкі па стварэнні і прасоўванні сеткавых праектаў, прэзентавалі карпаратыўны электронны рэсурс «Ян Чачот — прадвеснік беларускага Адраджэння», створаны ў супрацоўніцтве з калегамі Баранавіцкай ЦРБ імя Я. Чачота.
Вопытам арганізацыі даследчай, аналітычнай, інфармацыйнай працы дзяліліся калегі Баранавіцкай, Ляхавіцкай, Маларыцкай, Лунінецкай бібліятэчных сістэм, Брэсцкай ЦГБ імя А. С. Пушкіна, ЦБС г. Баранавічы. У відэадакладзе, які прадставілі бібліятэкары з Рэспублікі Малдова, была асветлена сістэма павышэння кваліфікацыі ў Гладзянскай раённай бібліятэцы імя В. Карабана.
Практычнае знаёмства з вопытам работы бібліятэк ДУК «Баранавіцкая РЦБС» адбылося на базе Мірскай і Гарадзішчанскай публічных бібліятэк. Удзельнікі круглага стала прайшлі па турыстычным маршруце «Калдычэўскі лагер смерці», які распрацавала супрацоўнік Гарадзішчанскай гарпасялковай бібліятэкі.
Завяршылася мерапрыемства ўрачыстым узнагароджаннем пераможцаў абласных тураў рэспубліканскіх конкурсаў «Бібліятэка — асяродак нацыянальнай культуры», «Библиотека — центр духовного просвещения и воспитания».
Кузьміна Ала Сцяпанаўна,
заг. навукова-метадычнага аддзела
Кантактны тэлефон: + 375 162 56 42 91