Not seeing a Scroll to Top Button? Go to our FAQ page for more info.
BY
 

Прэзентацыя паэтычнага зборніка Алены Ігнацюк “Будзе ўсё наадварот”

Прэзентацыя паэтычнага зборніка Алены Ігнацюк “Будзе ўсё наадварот”

Прэзентацыя паэтычнага зборніка Алены Ігнацюк “Будзе ўсё наадварот”

3 лістапада ў актавай зале Брэсцкай абласной бібліятэкі імя М. Горкага адбылася прэзентацыя чарговага паэтычнага зборніка Алены Ігнацюк “Будзе ўсё наадварот”.


Алена Ігнацюк нарадзілася 23 лютага 1962 г. у в. Восаўцы Драгічынскага раёна. Яна скончыла філалагічны факультэт Брэсцкага педагагічнага інстытута імя А. С. Пушкіна, працавала на радзіме, у Брэсце, у Мінску. Зараз, кандыдат філалагічных навук, Алена Ігнацюк выкладае ў Палескім дзяржаўным універсітэце, даследуе літаратуру, культуру, мастацтва, піша вершы. Паэзія Алены неаднаразова друкавалася ў беларускіх часопісах “Полымя”, “Маладосць”, “Нёман”, “Дзеяслоў”, “Роднае слова”, “Бярозка”, газеце “Літаратура і мастацтва”. Яна – аўтар паэтычных зборнікаў “Нота “ля” (Мінск, 2000), “Летаргія” (Мінск, 2006).Яе творчасць высока ацэньвалі Адам Мальдзіс, Уладзімір Арлоў, Леанід Галубовіч, Анатоль Кудравец.


Згодна традыцыі адкрыла імпрэзу дырэктар Бібліятэкі Тамара Данілюк, удумлівым і крыху іранічным мадэратарам мерапрыемства выступіў кандыдат філалагічных навук Уладзімір Сенькавец. Павіншаваць Алену Ігнацюк з новай кнігай прыйшлі брэсцкія пісьменнікі Мікола Пракаповіч, Лявон Валасюк, Уладзімір Лебедзеў, Мікола Аляхновіч, землякі Мікола Панасюк, Анатоль Дзенісейка і Міхась Кулеш. З Мінска прыехаў літаратуразнавец, крытык Ціхан Чарнякевіч, які прывёз прывітанні ад пісьменніцкай арганізацыі, а таксама асабіста Алеся Разанава і Васіля Жуковіча. Своеасаблівым падарункам для Алены стала мастацкае выкананне яе вершаў вучаніцамі ліцэя № 1 г. Брэста пад кіраўніцтвам Ларысы Візгульб.


Галоўны бібліёграф аддзела краязнаўчай літаратуры і бібліяграфіі Ірына Жэлянгоўская, вядомая як беларуская паэтэса Ярына Дашына, таксама далучылася да віншаванняў і звярнула ўвагу прысутных на змястоўную кніжную выставу аб жыцці і творчасці Алены Ігнацюк “Дакрануцца да няўлоўнага”. Ілюстрацыямі да выставы сталі фотаздымкі з асабістага архіва Алены: малая Алёнка з любімай няняй “мамай” Фрузай, выпускніца школы і студэнтка Алена, дарослая прыгожая жанчына... Выстава будзе дзейнічаць на працягу лістапада ў аддзеле краязнаўчай літаратуры і бібліяграфіі.


Кніга “Будзе ўсё наадварот” выйшла ў серыі “Бібліятэка Саюза беларускіх пісьменнікаў “Кнігарня пісьменніка”.У анатацыі выдаўцы напісалі: “Для філасофскага асэнсавання быцця, для пошукаў ідэальнага хараства, для размовы з паэзіяй паэтка абрала імпрэсіяністычную манеру пісьма, асацыятыўную вобразнасць і галоўнае – шчырасць”. Сама Алена лічыць новую кнігу своеасаблівым працягам дзвюх папярэдніх.


У масцы я… На карнавале.

Вобраз мой не разгадалі

ўсе, хто знаў раней мяне.

Маску не адняць ад твару –

Як прылепленую мару…

Карнавал мой праміне?!

Альбо…

Я гуляла з сабою ў хованкі…

І падглядвала за сабой…

Нават вецер прыгожа-лёгенькі

Захапляўся такой гульнёй.

Ад сябе ці ад ветру хавалася

Ў самай гушчы крыклівых падзей.

Хто шукаў мяне – адгукалася

На той час у палоне надзей:

што “гульня мая – непатрэбная…”.

Мне хавацца? Ці ў гэтым сэнс?

Ад сябе ўцякаю дарэмна я

ў новы горад ці казачны лес…


Таццяна Кавенька, загадчыца аддзела краязнаўчай літаратуры і бібліяграфіі

Тэлефон для даведак: +375(162)57 48 79








Возврат к списку