Not seeing a Scroll to Top Button? Go to our FAQ page for more info.
 

Кніжная выстава “Зямной непаўторнасці мала…”


Кніжная выстава “Зямной непаўторнасці мала…”

У зале аддзела краязнаўчай літаратуры і бібліяграфіі распачала сваю дзейнасць кніжная выстава “Зямной непаўторнасці мала…”, прысвечаная жыццю і творчай дзейнасці берасцейскага пісьменніка і перакладчыка Алеся Каско


Ён з’яўляецца лаўрэатам Літаратурнай прэміі імя Аркадзя Куляшова, Міжнароднай прэміі імя Ганны Краснапёркі (Германія), Літаратурнай прэміі Брэсцкага аблвыканкама імя У. Калесніка. 10 снежня Алесь Канстанцінавіч адзначае 65-гадовы юбілей. Адметна і годна гучыць голас нашага земляка ў сучаснай беларускай літаратуры:


* * *

Зямной непаўторнасці мала,

каб тое, што сееш, пажаць.

Маленства, юнацтва і сталасць —

Пад знакам адзіным: мяжа.


Але і пад гэтай пячаткай,

сарванай на міг, на іспыт,

жывеш не аднойчы пачаткам

дарогі ў бязмежны нябыт.


Бы храм, багавіш кут радзінны,

бы квет, беражэш маладосць,

мкнеш духам і словам з руціны,

дарма, што мяжа ўсё-ткі ёсць.


Даволі, што ёсць неўміручасць

імгнення; ёсць неба, зямля,

з якімі і зараз ты лучыш

сябе — і з’яднаеш пасля.


На выставе прадстаўлены асобныя зборнікі паэта, калектыўныя выданні, публікацыі ў мясцовым і рэспубліканскім перыядычным друку. Гэтыя крыніцы даюць магчымасць ўсім жадаючым азнаёміцца і з новымі творамі аўтара, і пагартаць старонкі сёння ўжо рарытэтных выданняў, каб прасачыць, з чаго пачынаўся творца Алесь Каско. Алесь Каско таксама вядомы як цікавы празаік, уважлівы публіцыст, таленавіты перакладчык. Ён выступае як адзін з аўтараў і ўкладальнікаў кніг: “Думы і песні Валыні. Творы паэтаў і празаікаў Вылыні ў перакладах берасцейскіх пісьменнікаў на беларускую мову” і "Берестейське багаття. Твори поетів і прозаȉків Берестейщіні в перакладах волинських літераторів украȉнською мовою”. Асобны раздзел прысвечаны літаратурна-крытычным даследванням і вывучэнню жыцця і творчай дзейнасці Алеся Канстанцінавіча. Сярод аўтараў водгукаў і рэцэнзій на яго творы: В. Я. Ляшук, Н. М. Борсук, А. А. Майсейчык, Л. М. Галубовіч і інш. Выстава аздоблена фатаздымкамі з фонда аддзела, на якіх адлюстраваны творца, яго родныя і блізкія, а таксама калегі па пяру.


Запрашаем усіх аматараў прыгожага пісьменства і прыхільнікаў творчасці пісьменніка ў аддзел краязнаўчай літаратуры і бібліяграфіі Брэсцкай абласной бібліятэкі імя М. Горкага, дзе на працягу снежня экспануецца кніжная выстава “Зямной непаўторнасці мала…”.


Ірына Жэлянгоўская, галоўны бібліёграф аддзела краязнаўчай літаратуры і бібліяграфіі

Тэлефон для даведак: +375(162)57 48 79


Возврат к списку