Not seeing a Scroll to Top Button? Go to our FAQ page for more info.
BY
 

Виртуальный музей Непрачытаная кніга В. Ф. Праскурава



Дзень беларускага пісьменства

Дзень беларускага пісьменства

Дзень беларускага пісьменства

Дзень беларускага пісьменства


Штогод у першую нядзелю верасня адзначаецца Дзень беларускага пісьменства. Традыцыйна гэта свята праходзіць у гарадах, якія з’яўляюцца гістарычнымі цэнтрамі культуры, навукі, літаратуры і кнігадрукавання. 


У гэтым годзе гасцей вітаў горад Іванава Брэсцкай вобласці.


У рамках свята ўдзельнікі і госці маглі азнаёміцца з новымі кніжнымі выданнямі, сустрэцца з беларускімі літаратарамі, паслухаць выступленні паэтаў і пісьменнікаў, творчых калектываў і выканаўцаў. Адбыліся: навукова-практычная канферэнцыя «Іванаўскія чытанні», Міжнародны круглы стол беларускіх і замежных літаратараў «Мастацкая літаратура як шлях адзін да аднаго», адкрыццё памятнага знака, прысвечанага ХХV, юбілейнаму, Дню беларускага пісьменства. Вялікую цікавасць у гасцей горада выклікаў фінал рэспубліканскага творчага конкурсу юных чытальнікаў «Жывая класіка», прысвечанага Году малой радзімы ў Беларусі, конкурс духавой музыкі «Фанфара-2018» і інш. 


Прыняла ўдзел у святочных мерапрыемствах і Брэсцкая абласная бібліятэка імя М. Горкага. Супрацоўнікамі Бібліятэкі была падрыхтавана разгорнутая выстава літаратуры «Напісанае застанецца».


Кнігі першага раздзелу экспазіцыі «Вытокі беларускай кніжнасці» дазваляюць здзейсніць экскурс у гісторыю беларускай кнігі, гісторыю кнігадрукавання Беларусі. 


З працы Вацлава Ластоўскага «Гісторыя беларускай (крыўскай) кнігі», якая выйшла ў 1926 г., можна даведацца пра большасць вядомых на той час помнікаў беларускага пісьменства, напісаных кірылічным алфавітам у ХІ–ХVIII стст. Вялікую цікавасць уяўляюць сабой прадстаўленыя на выставе факсіміле рукапісаў: «Тураўскае Евангелле: факсімільнае ўзнаўленне, даследаванні», «Житие блаженной Евфросинии, игумении монастыря Вседержителя Святого Спаса во граде Полоцке», «Баркалабаўскі летапіс»  і інш.
Поўнае ўяўленне аб развіцці кнігадрукавання ў Беларусі даюць кнігі: «Узнікненне кнігадрукавання ў Еўропе і Беларусі», «500 гадоў беларускага кнігадрукавання», «Чатырохсотлецьце беларускага друку, 1525–1925» (выйшла ў свет у1926 г.).


Другі раздзел выставы «Сталіцы свята беларускага слова» прысвечаны гарадам, у якіх праходзілі Дні беларускага пісьменства. Былі прадстаўлены матэрыялы аб архітэктурных помніках і выбітных асобах Полацка, Турава, Навагрудка, Нясвіжа, Оршы, Пінска і інш. гарадоў. Наведвальнікаў зацікавілі матэрыялы пра г. Іванава, пра лабараў (жыхароў горада, якія займаліся зборам грошай для царквы), пра святога Андрэя Баболю, пра радавое гняздо Дастаеўскіх у в. Дастоева, а таксама пра жыццё і дзейнасць Напалеона Орды, Аляксея Кузьміча, Хаіма Вейцмана і інш. Былі прадстаўлены творы пісьменнікаў, жыццё і дзейнасць якіх таксама звязаны з гэтым горадам: Аляксея Каўко, Васіля Жушмы, Анатоля Крэйдзіча, Уладзіміра Гетманчука, Адрэя Мазько, Валерыя Кухарчука і інш.


Традыцыйна падчас правядзення свята праходзіць узнагароджанне пераможцаў конкурсу «Нацыянальная літаратурная прэмія». На ўрачыстым адкрыцці Дня беларускага пісьменства былі названы лаўрэаты за 2017 год. У намінацыі «Найлепшы твор паэзіі» перамог Казімір Камейша са зборнікам вершаў «Высокі бераг»; у намінацыі «Найлепшы твор прозы» —  Васіль Шырко з кнігай «Я нязваны госць»; у намінацыі «Найлепшы твор драматургіі» —  Георгій Марчук са зборнікам п’ес  «Святло вышыні»; у намінацыі «Найлепшы твор публіцыстыкі» —  Зінаіда Дудзюк з кнігай «Пара высокага сонца»; у намінацыі «Найлепшы твор літаратурнай крытыкі і літаратуразнаўства» —  Іван Штэйнер з кнігай «Смехъ зъ болѣстию смешанъ будеть: смехавыя традыцыі Рэнесансу ў сатырычнай літаратуры ХХ стагоддзя»; у намінацыі «Найлепшы твор для дзяцей і юнацтва» — Вольга Нікольская з кнігай «Выкраданне шэдэўра, або Новыя прыгоды агентаў “Колбафіржык”»; у намінацыі «Найлепшы дэбют» — Юлія Алейчанка з кнігай «Пад чароўным шкельцам». 


 Пераможцы прэміі за мінулыя тры гады былі прадстаўлены ў трэцім раздзеле выставы «Нацыянальная літаратурная прэмія. Кнігі – лаўрэаты».


Чацвёртая частка выставы «Літаратура Берасцейшчыны: юбілеі года» прысвячалася пісьменнікам-юбілярам бягучага года. 2018 год багаты на юбілейныя даты нашых творцаў-землякоў, сярод якіх такія гучныя імёны, як Піліп Пестрак, Мікола Засім, Мікола Федзюковіч, Святлана Курылёва, Васіль Сахарчук, Ніна Мацяш, Яўгенія Янішчыц, Мікола Пракаповіч, Алесь Паплаўскі, Валерый Гапееў, Валерый Грышкавец і інш. На выставе прадстаўлены творы гэтых аўтараў. Тут можна было азнаёміцца з кнігамі лаўрэатаў Літаратурных прэмій імя Якуба Коласа, Івана Мележа, Аркадзя Куляшова, Дзяржаўнай прэміі БССР імя Янкі Купалы, прэміі Ленінскага камсамола Беларусі, а таксама літаратурнай прэміі Брэсцкага аблвыканкама імя У. А. Калесніка. Упрыгожваннем да мастацкіх твораў сталі і арыгінальныя фотаздымкі пісьменнікаў-юбіляраў з фонду Бібліятэкі.


Выстава экспануецца на працягу верасня ў двух аддзелах: агульнай чытальнай зале, аддзеле краязнаўчай літаратуры і бібліяграфіі


Запрашаем усіх, хто цікавіцца беларускай гісторыяй і літаратурай  наведаць выставу. 


Марашчук  Ірына Мікалаеўна, гал. бібліятэкар агульнай чытальнай залы,
Жэлянгоўская Ірына  Іванаўна, гал. бібліятэкар аддзела краязнаўчай літаратуры і бібліяграфіі,
Пінкевіч Алена Аляксееўна, бібліятэкар аддзела абанемента і МБА
Тэлефон для даведак:  +375 162 57 48 74, +375 162 57 48 79,+375 162 57 48 09


.


Возврат к списку