30 чэрвеня ў Мастацкім музеі (філіял Брэсцкага абласнога краязнаўчага музея) адбылося адкрыццё выставы «З Беларуссю ў сэрцы… З калекцыі Пятра Краўчанкі».

Арганізатарамі мерапрыемства выступілі Бібліятэка, Мастацкі музей, непасрэдна П. К. Краўчанка.

Пётр Кузьміч Краўчанка — вядомы беларускі дыпламат: міністр замежных спраў Беларусі (1990–1994), Надзвычайны і Паўнамоцны Пасол Беларусі ў Японіі і на Філіпінах (1998–2002), дэпутат Вярхоўнага Савета БССР (1990) і Рэспублікі Беларусь (1995–1996), кандыдат гістарычных навук; грамадскі дзеяч, калекцыянер.

У ходзе сустрэчы П. К. Краўчанка падрабязна прадставіў 29 рарытэтных прац з асабістай калекцыі, прысвечаных гісторыі Беларусі, у т. л. Берасцейшчыны. Гонарам калекцыі ён лічыць 11 пейзажных фотаздымкаў польскага фотамастака італьянскага паходжання Тэафіла-Эўгеніюша Барэцці, які некаторы час жыў у Беларусі і палюбіў яе. Работы адлюстроўваюць памятныя мясціны і архітэктурныя помнікі Беларусі: Нясвіж і замак Радзівілаў, Навагрудак, Завоссе, Туганавічы — месцы, звязаныя з жыццём і дзейнасцю А. Міцкевіча. На двух фотаздымках можна ўбачыць гістарычныя помнікі, якія да нашага часу не захаваліся — «стары скарбец» у Дабрамысле былога Слонімскага павета (цяпер Івацэвіцкага раёна Брэсцкай вобласці) і «фальварак» ва Усялюбе Навагрудскага раёна Гродзенскай вобласці.

Пасля прадстаўлення калекцыі Пётр Кузьміч Краўчанка падарыў некалькі рарытэтных дакументаў са свайго прыватнага «музея» старшыні Брэсцкага гарвыканкама А. С. Рагачуку, Бібліятэцы, Мастацкаму музею.

Затым слова ўзялі: А. С. Рагачук, Консул Генеральнага консульства Рэспублікі Польшча ў Брэсце пан Кшыштаф Расіньскі, краязнавец В. В. Мароз, дырэктар Бібліятэкі Т. П. Данілюк. Напрыканцы П. К. Краўчанка адказаў на пытанні ўдзельнікаў мерапрыемства.

Супрацоўнікамі агульнай чытальнай залы былі падрыхтаваны дзве выставы. Адна з іх прысвечана памятным гістарычным мясцінам Беларусі; другая — дзейнасці і творчасці П. К. Краўчанкі. Пад рубрыкай «П. К. Краўчанка раіць» была прадстаўлена гістарычная і мастацкая літаратура.

Мерапрыемства асвятлялі шматлікія сродкі масавай інфармацыі.

Глазкова Т. В., загадчык агульнай чытальнай залы

Тэлефон для даведак: +375 162 57 48 74

♦ Экс-министр иностранных дел Беларуси Петр Кравченко предложил включить празднование 1000-летия Бреста в официальный календарь ЮНЕСКО [Электронный ресурс] / Вечерний Брест – Брест, 2017. – Режим доступа: http://www.vb.by/society/history/kravchenko_collection.html – Дата доступа: 30.06.2017

♦ Выставка из коллекции Петра Кравченко в Бресте: «З Беларуссю ў сэрдцы. Пейзажныя фотаздымкі Тэафіла-Эўгеніюша Барэцці (XIX-XX стст.)» [Электронный ресурс] / TOMIN.BY – Брест, 2017. – Режим доступа: http://tomin.by/news/cult/19968-vystavka-petra-kravchenko-v-breste-pejzazhnyya-fotazdymki-teafila-e-geniyusha-baretstsi-xix-xx-stst – Дата доступа: 30.06.2017