11–12 лістапада 2021 г. у Іванаўскім раёне адбыліся ўрачыстыя мерапрыемствы, прысвечаныя 200-годдзю з дня нараджэння Ф. М. Дастаеўскага.

Пісьменнік, філосаф і мысліцель, без якога немагчыма ўявіць ні рускую, ні сусветную літаратуру, абавязаны сваім прозвішчам радаваму маёнтку продкаў — вёсцы Дастоева, што на Іванаўшчыне.

Навукова-практычная канферэнцыя «Асоба і творчасць Ф. М. Дастаеўскага ў кантэксце агульнакультурнай парадыгмы» адбылася на базе Цэнтральнай раённай бібліятэкі імя Ф. І. Панфёрава. Яна сабрала навукоўцаў, даследчыкаў, захавальнікаў спадчыны і аматараў творчасці класіка не толькі з розных куткоў Беларусі, але і Расіі, Украіны, Азербайджана і нават Кітая.

Брэсцкая абласная бібліятэка імя М. Горкага прэзентавала выставу «Мир Достоевского: глубокое погружение». Экспазіцыя ўключала каля двухсот выданняў, у т. л. каштоўных і рэдкіх, сярод якіх «Всеобщая история литературы» (1898) нямецкага літаратуразнаўцы Іагана Шэра, дзе ён называе Дастаеўскага гісторыкам рускай душы, шэсць тамоў з поўнага збору твораў Ф. М. Дастаеўскага (1895) і інш.

Літаратура змяшчала разгорнутую інфармацыю пра карані роду Дастаеўскіх, сувязі пісьменніка з Беларуссю, жыццё філосафа, у т. л. па ўспамінах сучаснікаў, дала магчымасць адчуць глыбіню асобы і творчасці Фёдара Міхайлавіча, пазнаёміла з лепшымі літаратуразнаўчымі работамі. Асаблівую цікавасць выклікаў раздзел «Достоевский в XXI веке: перепрочтение». Ён раскрыў уплыў класіка на развіццё сучаснай беларускай літаратуры.

Фёдар Міхайлавіч ніколі не быў у Дастоеве, але вось ужо шмат гадоў усе дарогі ўпэўнена вядуць сюды прыхільнікаў і знатакоў творчасці вялікага аўтара, дзе слаўнае прозвішча памятаюць і шануюць.

Прадастаўлена аддзелам сацыякультурнай дзейнасці і маркетынгу

Кантактны тэлефон: +375 162 57 48 76