З 12 па 28 кастрычніка 2026 года ў аддзеле перыядычных выданняў Брэсцкай абласной бібліятэкі ім. М. Горкага пройдзе выстава «Па прыродзе і прызванню», прымеркаваная да Рэспубліканскага тыдня бацькоўскай любові.

14 кастрычніка ў Рэспубліцы Беларусь адзначаецца Дзень маці, гісторыя якога сыходзіць каранямі ў рэлігійнае свята — Пакроў Прасвятой Багародзіцы. Пачынаючы з 2022 года, 21 кастрычніка ў нашай краіне з асаблівай павагай адзначаецца Дзень бацькі. Прамежак часу паміж гэтымі датамі стаў вядомы як Рэспубліканскі тыдзень бацькоўскай любові.

Сям'я — гэта не толькі каштоўнасць, але і найважнейшы сацыяльны інстытут грамадства. Бацькі адыгрываюць ключавую ролю ў яе станаўленні і існаванні, закладваючы жыццёвыя арыенціры для сваіх дзяцей. Гэта, у сваю чаргу, садзейнічае ўмацаванню прэстыжу сям'і і паўнацэннаму развіццю грамадства і дзяржавы. У Рэспубліцы Беларусь удзяляецца асаблівая ўвага вырашэнню праблем сям'і, мацярынства і дзяцінства, а таксама стварэнню ўмоў для павышэння якасці жыцця кожнага грамадзяніна.

На выстаўцы прадстаўлены публікацыі, прысвечаныя гісторыі свята, папулярызацыі сямейных каштоўнасцей, умацаванню інстытута сям'і, праблемам прыёмных бацькоў, а таксама ролі кожнага з бацькоў у выхаванні падрастаючага пакалення.

Экспазіцыя падрыхтавана на аснове матэрыялаў часопісаў: «Здоровый образ жизни», «Мир медицины», «Алеся», «Кудесница», «Веснік адукацыі», «Адукацыя і выхаванне», «Пачатковая школа», «Родина», «Социс» і іншых.

Аддзел перыядычных выданняў

+375 162 57 48 39