У 2024 годзе спаўняецца 85 гадоў стварэння Брэсцкай вобласці. Роўна столькі ж гадоў спаўняецца і галоўнаму друкаванаму выданню рэгіёна — абласной грамадска-палітычнай газеце «Заря».

За 85 гадоў журналісты «Зары» упісалі нямала яркіх старонак у летапіс гісторыі Берасцейшчыны. І сёння «Заря» нясе сваім чытачам навіны, дорыць сустрэчы з цікавымі суразмоўцамі і прапануе багатую палітру інфармацыі. За гады дзейнасці выйшла больш за 24 тыс. нумароў.

16 мая ў Брэсцкай абласной бібліятэцы імя М. Горкага адбылася сустрэча з рэдакцыяй «Зары» — галоўным рэдактарам Ігарам Уладзіміравічам гетманам, рэдактарам аддзела палітыкі і эканомікі Яўгенам Віктаравічам Літвіновічам і рэдактарам аддзела інтэрнэт-праектаў Вольгай Ігараўнай Свірыдовіч.

Госці распавялі пра яркія старонкі гісторыі газеты і пра дзень сённяшні, падзяліліся сакрэтамі журналісцкіх будняў, успомнілі свае першыя артыкулы і самыя папулярныя публікацыі.

Першы нумар «Зары» пабачыў свет восенню 1939 года. Тады яна выходзіла толькі раз на тыдзень — са зменнымі палосамі на польскай і габрэйскай мовах, а ўжо праз пару месяцаў — у снежні — перайшла на беларускую мову і выдавалася накладам 20 тыс. асобнікаў. Газета была органам Брэсцкага абкама КП(б)Б у гады Вялікай Айчыннай вайны газета выдавалася падпольна — рэдакцыя і друкарня размяшчаліся ва ўрочышчы Хаваншчына Івацэвіцкага раёна.

Сёння «Заря» выходзіць два разы на тыдзень аб'ёмам 48 старонак і тыражом 25 тыс. экзэмпляраў, таксама прадстаўлена ў Інтэрнэце асобным сайтам і старонкамі ў папулярных сацыяльных сетках. У штаце рэдакцыі-прафесійныя журналісты, фотакарэспандэнты, дызайнеры, а таксама ўласныя карэспандэнты ў рэгіёнах.

Пасля інтэрв'ю з гасцямі прысутным быў прэзентаваны інтэрнэт-праект абласной бібліятэкі «Гэты дзень у гісторыі Берасцейшчыны», у аснове якога — матэрыялы «Зары».

Аддзел перыядычных выданняў падрыхтаваў выставу «Заря. Юбилейная история», якая адлюстравала этапы развіцця газеты, пазнаёміла з рэдактарамі і журналістамі, якія ў розны час працавалі ў выданні, з дасягненнямі і ўзнагародамі калектыву. Асобная частка экспазіцыі прадставіла публікацыі «Зары» аб дзейнасці абласной бібліятэкі. Таксама ў гасцей і ўдзельнікаў мерапрыемства была магчымасць азнаёміцца з падшыўкамі газеты за розныя гады, пачынаючы з 1946-га і заканчваючы 2024-м. Усе яны захоўваюцца ў фондзе абласной бібліятэкі.

У завяршальнай частцы сустрэчы прысутныя азнаёміліся з электроннай бібліятэкай — бібліятэчным прадуктам, які змяшчае каля 40 тыс. экзэмпляраў лічбавых копій краязнаўчых выданняў і рэгулярна папаўняецца. Сярод дакументаў электроннай бібліятэкі — кнігі і выданні рэгіянальнай перыёдыкі: газета «Народная трыбуна» з 1990 па 1999 гг.; раённыя газеты 40-60-х гг. ХХ ст., у тым ліку газеты неіснуючых цяпер тэрытарыяльных дзяленняў («Перамога» Антопальскага раёна, «Ленінскі шлях» Жабінкаўскага раёна, «Чырвоны сцяг» Пружанскага раёна, «Авангард» Лунінецкага раёна і інш.), і, вядома ж, абласная газета «Заря». У электроннай бібліятэцы яна прадстаўлена з 1946 па 1978 гг. Доступ да электроннай бібліятэцы лакальны, г. зн. прадастаўляецца ў чытальных залах.

У мерапрыемстве прынялі ўдзел чытачы і прыхільнікі газеты, карыстальнікі бібліятэкі, навучэнцы каледжа сувязі — будучыя спецыялісты паштовых аддзяленняў, студэнты першага курса філалагічнага факультэта БрДУ імя А. С. Пушкіна спецыяльнасці «Літаратурна-рэакцыйная дзейнасць», члены Брэсцкага аддзялення Саюза пісьменнікаў Беларусі са старшынёй Таццянай Анатольеўнай Дземідовіч, а таксама паэт, публіцыст, журналіст Георгій Сцяпанавіч Тамашэвіч — чалавек, які прысвяціў журналістыцы шмат гадоў жыцця.

Аддзел маркетынгу і сацыякультурнай дзейнасці

+375 162 57 48 76