4 мая 2023 г. у аддзеле рэдкай кнігі Брэсцкай абласной бібліятэкі імя М. Горкага пачынае працу выстава «Веліч слова славянскага», прысвечаная Дню славянскага пісьменства і культуры. Гэтае свята штогод адзначаецца 24 мая ў Беларусі, Расіі, Украіне, Сербіі, Балгарыі і многіх іншых славянскіх дзяржавах. У Дзень славянскага пісьменства мы ўспамінаем пра вытокі духоўнасці, пра старажытныя і вялікія традыцыі славянскай культуры, пра ролю пісьменства ў яе станаўленні і развіцці.

Гэта свята непарыўна звязана з ушанаваннем Святых роўнаапостальных Кірылы і Мяфодзія — асветнікаў славян, стваральнікаў славянскага пісьменства. Менавіта Кірыл і Мяфодзій стварылі славянскую азбуку, якой мы карыстаемся і сёння. Яны заклалі асновы асаблівай, царкоўна-славянскай мовы і перакладалі на яе Евангелле, Апостал, Псалтыр і іншыя богаслужэбныя кнігі. 

Пра братоў Кірыла і Мяфодзія і іх неацэнны дар усім славянам гаворыцца ў «Аповесці мінулых гадоў»: «І рады былі славяне, што пачулі пра веліч Божую на сваёй мове».

На выстаўцы чытачы змогуць убачыць факсімільныя выданні Баркулабаўскага і Радзівілаўскага летапісаў, Тураўскага, Полацкага, Лаўрышаўскага і Слуцкага Евангелляў, Жыція Еўфрасінні Полацкай, манаграфіі па гісторыі рукапіснай і друкаванай славянскай кнігі, выданні, прысвечаныя вывучэнню беларускіх славян.

Асаблівай увагі заслугоўваюць прадстаўленыя на выставе выданні, надрукаваныя больш за 100 гадоў таму: «История русской словесности (учебник для средних учебных заведений)» (1902 г.), «Сокращенная практическая славянская грамматика» (1912 г.), журнал «Филологические записки» (1879 г.). У іх можна знайсці інфармацыю аб Кірыле і Мяфодзіі, аб славянскім алфавіце і правапісе, аб царкоўна-славянскай мове з тлумачэннем яе этымалогіі і абазначэннем яе месца сярод іншых славянскіх моў.

Экспазіцыя будзе цікава не толькі навучэнцам і студэнтам, але і педагогам, філолагам, а таксама ўсім аматарам айчыннай культуры, гісторыі мовы і кніжнасці.

Аддзел рэдкай кнігі запрашае ўсіх жадаючых пазнаёміцца з матэрыяламі новай выставы, якая будзе функцыянаваць з мая па жнівень.

Аддзел рэдкай кнігі

+375 162 57 48 30