Сёння маладое пакаленне арыентуюць на думкі пра тое, што трэба займацца дакладнымі навукамі, вывучэннем замежных моў, бо менавіта за імі будучыня.

Між тым, менавіта культура з’яўляецца наймагутнейшым фактарам эканамічнага развіцця і закладвае асновы развіцця асобы. Вобразна кажучы, культура — «душа» грамадства, аснова духоўна-маральных арыенціраў грамадзян, іх нацыянальнай самасвядомасці і патрыятызму. Сёння наша прадметнае асяроддзе створана еўрапейскай, амерыканскай, усходняй — якімі заўгодна цывілізацыямі, і, на жаль, беларусы вельмі павярхоўна ведаюць пра нашы карані і дасягненні. А ў нашага народа ёсць свая багатая спадчына.

Каб выклікаць цікавасць да самабытнай культуры Беларусі, супрацоўнікамі Брэсцкай абласной бібліятэкі імя М. Горкага быў распрацаваны цыкл сустрэч «Культурныя вандроўкі». У цыкл вандровак увайшлі 3 мерапрыемствы, любое з якіх можна замовіць загадзя:

·           інтэлектуальна-забаўляльнае спаборніцтва па асновах традыцыйнай культуры Беларусі «Вытокі»;

·           майстар-клас «Беларускі арнамент»;

·           фальклорная гадзіна «А ў нас Масленіца!».

Інтэлектуальна-забаўляльнае спаборніцтва «Вытокі» пабудавана па прынцыпах гульні квіз. Гэта цікавы і зручны спосаб узаемадзеяння з аўдыторыяй, пад час якога ўдзельнікі не толькі весела бавяць свой час, але і ў нязмушанай форме знаёмяцца з каляндарнымі абрадамі, прадметамі сялянскага быту, культурай побыту і фальклорам нашых продкаў.

Дзякуючы майстар-класу «Беларускі арнамент» можна не толькі даведацца пра значэнне асноўных сімвалаў арнаменту, але і паспрабаваць скласці свой унікальны ўзор.

Падчас фальклорнай гадзіны ўдзельнікі дазнаюцца пра асаблівасці святкавання Масленіцы на Беларусі, варожаць на блінах і ствараюць уласную ляльку-абярэг.

Цыкл «Культурныя вандроўкі» — гэта спроба далучыць моладзь да спадчыны і культурных нормаў нашых продкаў, да тых каштоўнасцей, што выяўляюць нацыянальнае аблічча народа, яго душу, імкненні — тое, што мы павінны шанаваць і памнажаць.