Беларусь і Кітай — прыязныя краіны, якія прайшлі ў найноўшай гісторыі трыццацідвухгадовы шлях ад дыпламатычнага супрацоўніцтва да ўсепагоднага і ўсебаковага стратэгічнага партнёрства і ўзаемавыгаднага супрацоўніцтва. Грамадзян Беларусі і Кітая геаграфічна аддзяляюць тысячы кіламетраў, але аб'ядноўваюць агульныя каштоўнасці, у аснове якіх — адкрытасць, добрасардэчнасць, міралюбнасць. Цікавасць да Кітаю ў Беларусі, у тым ліку на Брэстчыне, сёння велізарная. Беларусы хочуць спазнаваць гісторыю і культуру Кітая, вывучаць мову.

Брэсцкая абласная бібліятэка імя М. Горкага пры падтрымцы Ўпраўлення культуры Брэсцкага аблвыканкама падрыхтавала і рэалізавала з 6 па 14 сакавіка 2024 г. праект «Дни китайской культуры и литературы в Бресте». Партнёрамі бібліятэкі выступілі: Саюз пісьменнікаў Беларусі, Выдавецкі дом «Звязда», Інстытут Канфуцыя Брэсцкага дзяржаўнага ўніверсітэта імя А. С. Пушкіна, Брэсцкі дзяржаўны тэхнічны ўніверсітэт.

Мэта праекта-знаёмства жыхароў Брэстчыны з Паднябеснай праз яе гісторыю і традыцыі, шырокую палітру гуманітарнага ўзаемадзеяння Беларусі і Кітая, у тым ліку літаратурныя сувязі, Сумесныя адукацыйныя праекты, народную дыпламатыю.

6 сакавіка адбылося адкрыццё праекта. У ліку гасцей сустрэчы, якія выступілі з прывітальным словам, былі: начальнік аддзела па каардынацыі дзейнасці арганізацый культуры ўпраўлення культуры Брэсцкага аблвыканкама Л. А. Свідуновіч; старшыня Саюза пісьменнікаў Беларусі, дырэктар, галоўны рэдактар Выдавецкага дома «Звязда» А. М. Карлюкевіч; кіраўніцтва Інстытута Канфуцыя БрДУ імя А. С. Пушкіна: дырэктар з кітайскага боку Фан Шэнлян, дырэктар з беларускага боку А. Я. Саідзі; першы прарэктар БрДТУ М. У. Нярода. Акрамя таго, па відэасувязі з Кітая да ўдзельнікаў мерапрыемства звярнуўся дырэктар Цэнтра вывучэння Беларусі ва Усходне-Кітайскім педагагічным універсітэце ў Шанхаі прафесар Бэй Вэньлі.

А. М. Карлюкевіч, аўтар цэлага шэрагу кніжных выданняў, публікацый у перыёдыцы, прысвечаных даследаванню беларуска-кітайскіх літаратурных сувязяў, распавёў пра гісторыю культурнага ўзаемадзеяння народаў Беларусі і Кітая, адзначыў важнасць пашырэння культурнай прасторы, у тым ліку «літаратурнага пабрацімства» дзвюх краін; падзяліўся планамі на далейшае развіццё серыі кніг кітайскай паэзіі ў перакладзе на беларускую мову «Светлыя знакі: паэты Кітая».

Студэнты з Кітайскай Народнай Рэспублікі, якія праходзяць навучанне ў БрДТУ, чыталі вершы кітайскіх паэтаў у перакладзе на беларускую мову. Гучалі творы Ван Вэя, Ай Цына, Лі Бо, Лі Хэ, Ду Фу; верш Я. Купалы «А хто там ідзе?» прачыталі на кітайскай мове.

12 сакавіка прайшла другая сустрэча, у цэнтры якой была інфармацыйна-адукацыйная тэматыка, міжнароднае супрацоўніцтва дзвюх нашых краін у адукацыйнай сферы.

Дырэктар Інстытута Канфуцыя БрДУ імя А. С. Пушкіна Фан Шэнлян выступіў з лекцыяй «Китай: сообщество единой судьбы». Ён раскрыў асноўныя палажэнні канцэпцыі, прапанаванай кіраўніком кітайскай дзяржавы Сі Дзіньпінам. Важную ўвагу дырэктар Інстытута Канфуцыя надаў асаблівасцям кітайскай культуры, падзяліўся ўражаннямі ад жыцця і працы ў Брэсце. Даў інфармацыю аб дзейнасці Інстытута Канфуцыя БрДУ імя А. С. Пушкіна.

Дэкан эканамічнага факультэта БрДТУ В. В. Зазерская выступіла з тэмай «Міжрэгіянальнае супрацоўніцтва Беларусі і Кітая ў галіне адукацыі на прыкладзе Брэсцкага дзяржаўнага тэхнічнага ўніверсітэта». У цяперашні час у БрДТУ дзейнічаюць сумесныя праграмы з ВНУ Кітайскай Народнай Рэспублікі. З 2021 г.ажыццяўляецца рэалізацыя сумеснай адукацыйнай праграмы з Синьсянским універсітэтам, у рамках якой штогод больш за 100 кітайскіх студэнтаў навучаюцца па некалькіх спецыяльнасцях: «Эканоміка», «Машынабудаванне». Акрамя адукацыйнай дзейнасці ў БрДТУ студэнты з Кітая ўцягнутыя ў сацыякультурныя праекты. Дэкан эканамічнага факультэта на прыкладзе дзейнасці БрДТУ распавяла пра тое, як развіваецца міжнароднае супрацоўніцтва дзвюх краін у навуковай сферы, распрацоўцы і рэалізацыі інавацыйных праектаў, актуальных як для Кітая, так і для Беларусі.

Тэма трэцяй сустрэчы, якая прайшла 13 сакавіка, — «Я изучаю китайский язык». Дырэктар Інстытута Канфуцыя БрДУ імя А. С. Пушкіна А. Я. Саідзі пазнаёміла слухачоў з асноўнымі напрамкамі работы інстытута, сярод якіх: курсы кітайскай мовы з фарміраваннем груп розных узроўняў (ад пачаткоўца да прасунутага); правядзенне міжнародных экзаменаў HSK, HSKK на веданне кітайскай мовы, культурныя мерапрыемствы па вывучэнні культуры Кітая.

Навучэнцы з агульнаадукацыйных школ г. Брэста (ДУА «Сярэдняя школа № 7 г. Брэста, «Гімназія № 5 г. Брэста») перадалі прыгажосць кітайскай культуры: чыталі вершы, выканалі песні на кітайскай мове, дэманстравалі класічныя кітайскія танцы. Выкладчыкі кітайскай мовы з гэтых навучальных устаноў распавялі аб навучальным працэсе, аб культурных мерапрыемствах па папулярызацыі кітайскай культуры і традыцый.

Прайшлі майстар-класы па чайнай цырымоніі, кітайскай каліграфіі, жывапісу, пляценні вузлоў, арыгамі. У якасці настаўнікаў выступілі выкладчыкі, выпускнікі і магістранты з Кітая з БрДУ імя А. С. Пушкіна. Мастацтва каліграфіі прадстаўляў дырэктар Інстытута Канфуцыя з кітайскага боку Фан Шэнлян.

14 сакавіка адбылося чацвёртае мерапрыемства — «Белорусы в Китае». Галоўным госцем сустрэчы стала А. В. Шчэрба, выкладчык БрДТУ. Яна чатыры разы была ў Кітаі, працавала выкладчыкам рускай мовы ў універсітэце г. Хайнань. Выкладчык распавяла аб жыццёвых асновах кітайцаў, аб узроўні выхавання, аб культурных традыцыях, аб кітайскай кухні.

Па відэасувязі з Кітая да ўдзельнікаў сустрэчы звярнулася Ганна Лю — берасцейка, якая ў цяперашні час жыве ў г. Чжэнчжоў і працуе выкладчыкам класічнага танца ў інстытуце навукі і тэхналогій Хуанхэ. Яна распавяла пра сваю сям'ю, жыццё ў Кітаі.

На працягу дзён кітайскай культуры і літаратуры ў Брэсце экспанавалася выстава «Беларусь — Китай: открытость, гармония, мир». Гісторыя Кітая ад старажытнасці да цяперашняга часу; беларуска-кітайскія адносіны ў палітыцы і эканоміцы ў гістарычнай рэтраспектыве; «масты творчасці» ў выглядзе перакладной літаратуры (з кітайскай на беларускую мову, з беларускай на кітайскую); народная дыпламатыя, як важнейшы фактар умацавання дружбы паміж народамі, — вось асноўныя аспекты прадстаўленай літаратуры. Сярод дакументаў экспазіцыі — унікальныя кнігі з калекцыі А. М. Карлюкевіча, перададзенай ім бібліятэцы з асабістага архіва. Т. В. Глазкова, загадчык агульнай чытальнай залы абласной бібліятэкі, прадстаўляла матэрыялы экспазіцыі падчас сустрэч.

Агульная колькасць удзельнікаў мерапрыемстваў склала больш за 200 чалавек.

Берасцейцам была цікавая тэма і фармат сустрэч, абраныя для дзён кітайскай культуры і літаратуры ў Берасці. Гэта пацвярджае тое, што лёсы і культуры Беларусі і Кітая цесна пераплецены. Беларусы і кітайцы імкнуцца лепш пазнаць і зразумець адзін аднаго, і самае галоўнае — разам працаваць на карысць умацавання дружбы і супрацоўніцтва дзвюх краін.

Агульная чытальная зала

+375 162 57 48 74