20 лютага 2023 г. у Брэсцкай абласной бібліятэцы імя М. Горкага адбылося мерапрыемства, прысвечанае Дню абаронцаў Айчыны і Узброеных сіл Рэспублікі Беларусь. Цяперашні год — гэта год 105-годдзя з дня заснавання Узброеных сіл Беларусі. І вельмі значна, што на сустрэчу з моладдзю — навучэнцамі трох каледжаў г. Брэста — былі запрошаны прадстаўнікі 38-й Брэсцкай асобнай гвардзейскай Венскай Чырванасцяжнай дэсантна-штурмавой брыгады: гвардыі маёр Дзмітрый Віктаравіч Бялецкі, гвардыі радавы Уладзіслаў Юр’евіч Макарэвіч і Наталля Уладзіміраўна Бараноўская.

Дзмітрый Віктаравіч расказаў аб слаўных баявых традыцыях дэсантнікаў, сучасных буднях ваеннаслужачых і вырашэнні складаных вучэбна-баявых задач. Выступленне суправаджалася паказам відэаролікаў аб дзейнасці падраздзялення.

Наталля Уладзіміраўна Бараноўская падзялілася вопытам работы па патрыятычным выхаванні моладзі, правядзенні розных акцый з удзелам прадстаўнікоў падраздзялення.

У ходзе сустрэчы госці паказалі і творчыя вакальныя здольнасці —выканалі некалькі песень ваенна-патрыятычнай тэматыкі.

Супрацоўнікамі агульнай чытальнай залы ў рамках мерапрыемства была прадстаўлена выстаўка літаратуры «На варце рубяжоў Айчыны». Побач з экспазіцыяй можна было ўбачыць і пагартаць некалькі «дэмбельскіх» альбомаў.

Для ўдзельнікаў мерапрыемства адбылася віктарына «Служу Айчыне», пераможцы атрымалі памятныя сувеніры.

Кранальным момантам у завяршэнні сустрэчы стала ўручэнне «Ліста салдату», напісанага навучэнцамі каледжа транспарту і сэрвісу ў адрас вайскоўцаў 38-й брыгады.

Агульная чытальная зала.

+375 162 57 48 74