У рамках рэспубліканскай акцыі «Адзіны дзень бяспекі» (20 лютага – 1 сакавіка) у Брэсцкай абласной бібліятэцы імя М. Горкага адбыўся шэраг прафілактычных мерапрыемстваў, накіраваных на прапаганду ведаў у галіне бяспекі жыццядзейнасці, папярэджанне правапарушэнняў і злачынстваў, навучанне правілам паводзін ва ўмовах розных надзвычайных сітуацый і фарміраванне здаровага ладу жыцця.

У юнацкім аддзеле для навучэнцаў старэйшых класаў СШ № 3 г. Брэста адбылася публічная лекцыя ўрача-псіхатэрапеўта Брэсцкага абласнога наркалагічнага дыспансера Уладзіслава Ігаравіча Прэцкайла «Моладзь выбірае здароўе і бяспеку». Сустрэча была прысвечана праблемам і наступствам немедыцынскага спажывання наркатычных сродкаў, псіхатропных, таксічных і іншых адурманьваючых рэчываў.

У дзіцячым аддзеле для чытачоў пачатковага школьнага ўзросту адбылася віктарына «Забараняецца-дазваляецца», падчас якой дзеці вывучылі галоўныя формулы АБЖ, даведаліся, што такое небяспечныя і надзвычайныя сітуацыі, узгадалі прыказкі аб агні, пажары, адгадалі складаныя загадкі. Падборка кніг з фонду аддзела дапамагла справіцца з гэтай задачай.

З 20 па 27 лютага ў юнацкім аддзеле экспанавалася выстава «Таямнічая павуціна: бяспека ў Інтэрнеце». Сусветная павуціна можа быць выдатным месцам як для навучання, так і для адпачынку і зносін з сябрамі. Аднак, як і ўвесь рэальны свет, сетка таксама нясе небяспеку. Матэрыялы экспазіцыі дапамогуць юным карыстальнікам Інтэрнэту разабрацца, як заставацца ў бяспецы ў кіберпрасторы і пазбегнуць існуючых рызык (непажаданы кантэнт, кібербулінг, гульнявая залежнасць і інш.).

23 лютага перад супрацоўнікамі бібліятэкі выступілі галоўны прававы інспектар працы Брэсцкага абласнога камітэта Беларускага прафесійнага саюза работнікаў культуры, інфармацыі, спорту і турызму Васілюк Сяргей Рыгоравіч і намеснік дырэктара абласной бібліятэкі па адміністрацыйна-гаспадарчай дзейнасці Казлова Вольга Аляксандраўна. Сяргей Рыгоравіч пазнаёміў з апошнімі змяненнямі ў працоўным заканадаўстве Рэспублікі Беларусь, а таксама надаў увагі пытанням захавання працоўнай і выканальніцкай дысцыпліне, рэжыму працы і адпачынку работнікаў сферы культуры. Вольга Аляксандраўна нагадала пра парадак дзеянняў работнікаў пры атрыманні інфармацыі аб учыненні або пагрозе ўчынення тэракта, выяўленні выбухованебяспечных і падазроных прадметаў. У рамках Адзінага дня бяспекі адбылася трэніроўка дзеянняў работнікаў у выпадку ўзнікнення пажару.

Аддзел маркетынгу і сацыякультурнай дзейнасці

Кантактны тэлефон: +375 162 57 48 76