З 5 студзеня па 1 лютага 2023 года ў аддзеле перыядычных выданняў будзе экспанавацца выстаўка перыёдыкі «Мовы рысы непаўторныя: часопісу “Роднае слова” — 35 год» з цыкла “Юбілейная гісторыя”.

«Роднае слова» — навукова-метадычны ілюстраваны часопіс Міністэрства адукацыі Рэспублікі Беларусь. Ён заснаваны ў 1987 г. як штомесячнае навукова-метадычнае выданне для настаўнікаў беларускай мовы і літаратуры. Часопіс пачаў выходзіць са студзеня 1988 года пад назвай «Беларуская мова і літаратура ў школе».

У 1992 годзе выданне было перарэгістравана пад новай назвай — «Роднае слова».

Часопіс асвятляе пытанні літаратурнай, моўнай і культуралагічнай адукацыі ў агульнаадукацыйнай школе і ВНУ. У ім публікуюцца матэрыялы па гісторыі нацыянальнай культуры, сучасным літаратурным працэсе, моўных праблемах, міжмоўных адносінах, самабытнасці беларускай мовы.

На старонках выдання адлюстраваны шляхі развіцця нацыянальнай школы, педагагічнае майстэрства, дасягненні філалагічнай навукі, а беларуская мова разглядаецца ў кантэксце еўрапейскіх моў, перш за ўсё славянскіх. У выданні публікуюцца матэрыялы, прымеркаваныя да юбілейных дат вядомых беларускіх пісьменнікаў і паэтаў.

На выставе прадстаўлены юбілейныя нумары, а таксама артыкулы па гісторыі выдання часопіса.     

Аддзел перыядычных выданняў

+375 162 57 48 39