У аддзеле літаратуры па мастацтве адкрылася выстава «Илья Ефимович Репин», прысвечаная 180-годдзю з дня нараджэння мастака. Ілля Яфімавіч Рэпін (1844–1930) — выдатны рускі жывапісец XIX–XX стагоддзяў, акадэмік Імператарскай Акадэміі мастацтваў, член Таварыства перасоўнікаў.

І. Я. Рэпін вядомы як адзін з найвялікшых рускіх мастакоў, бо менавіта з яго творчасцю звязаны вышэйшыя дасягненні рэалістычнага мастацтва другой паловы XIX стагоддзя. Творчая спадчына Іллі Яфімавіча вялікая. Ён праявіў сябе як майстар гістарычнай і бытавой карціны, пейзажыст, партрэтыст, цудоўны малявальшчык, мемуарыст, а таксама як настаўнік. З рэпінскай майстэрні выйшлі такія таленты як В. А. Сяроў, Б. М. Кустодзіеў, П. А. Малявін, Д. М. Кардоўскі, С. Ф. Калеснікаў, І. С. Гарушкін-Саракапудаў, І. І. Бродскі, К. А. Вяшчылаў, М. І. Фешын і многія іншыя.

На выставе прадстаўлены выданні, якія знаёмяць з жыццём і творчасцю І. Я. Рэпіна: манаграфіі, зборнікі ўспамінаў сучаснікаў жывапісца, а таксама ўспаміны самога мастака, перыядычныя выданні, мастацкія альбомы і паштоўкі з рэпрадукцыямі карцін.

Прапануем наведаць выставу, якая будзе адкрыта да канца жніўня.

Аддзел літаратуры па мастацтве

+375 162 57 48 78