4 студзеня 2020 г. споўнілася 235 гадоў з дня нараджэння аднаго з самых вядомых і любімых казачнікаў свету — Якаба Грыма. Яго юбілею прысвечана выстава «Die Märchenstraße von Brüdern Grimm» («Дорога сказок братьев Гримм»).

Збіраннем і вывучэннем народных казак браты Грым захапіліся ў юнацтве. Абодва атрымалі выдатную адукацыю, былі вядомымі навукоўцамі-філолагамі, служылі прафесарамі ў Берлінскім універсітэце. Якаб і Вільгельм вывучалі гісторыю нямецкай мовы, нацыянальную літаратуру, стварылі «Нямецкую граматыку» і першы слоўнік нямецкай мовы.

Але ж славу ім прынеслі тры зборнікі «Дзіцячых і сямейных казак» (1812, 1815, 1822 гг.). За ўсё сваё жыццё братамі Грым было напісана 210 казак і легенд. Іх казкі пераведзены на ўсе мовы свету, імі зачытваюцца дзеці вось ужо больш за 200 гадоў, створана некалькі дзясяткаў экранізацый.

«Нямецкая дарога казак» — знакаміты і вельмі папулярны ў Германіі маршрут — праходзіць праз старадаўнія сярэднявечныя гарады, у якіх многія аб’екты ўнесены ў спіс аб’ектаў Сусветнай спадчыны ЮНЕСКА, і складае каля 600 кіламетраў.

Яркая і маляўнічая кніга Iba E. M. Deutsche Märchenstraße: ein Reise- und Lesebuch mit Märchen, Sagen und Legenden (Хамельн, 2018) — дар Пасольства ФРГ у Мінску. У ёй вы знойдзеце казачную, гістарычную і турыстычную інфармацыю пра больш чым 60 мястэчак, якія да гэтага часу захоўваюць таямніцы братоў Грым.

Перачытаць любімыя з дзяцінства казкі, акунуцца ў чароўны свет братоў Грым і прайсціся па іх «дарозе казак» можна будзе ў аддзеле літаратуры на замежных мовах Брэсцкай абласной бібліятэкі імя М. Горкага з 10 да 31 студзеня 2020 года. У рамках выставы будзе прадстаўлены мультфільм «Рапунцель: запутанная история» і фільм «Беляночка и Розочка».

Відэапаказы адбудуцца:

18.01.2020 а 15:00 — мультфільм на нямецкай мове «Рапунцель: Запутанная история» (ЗША, 2010, 100 хв.).

25.01.2020 а 15:00 — фільм на нямецкай мове «Беляночка и Розочка» (Германія, 2018, 88 хв.).

Болдык Вікторыя Аляксандраўна,

бібліятэкар аддзела літаратуры на замежных мовах

Кантактны тэлефон: +375 162 59 21 74