Да 85-годдзя Брэсцкай вобласці супрацоўнікі сектара рэдкай кнігі падрыхтавалі некалькі музейна-бібліятэчных заняткаў. Працягвае карыстацца попытам тэма «Национальный символ Беларуси: открываем для себя Беловежскую пущу». 19 лістапада мерапрыемства наведалі навучэнцы 11-га класа СШ № 19 г. Брэста імя Героя Савецкага Саюза С. І. Сікорскага, 20 лістапада — студэнты 2-га курса філалагічнага факультэта БрДУ ім. А. С. Пушкіна.

Здаецца, мы так шмат ведаем пра Белавежскую пушчу… Але варта толькі глыбей пагрузіцца ў дзіўны свет гэтага рэліктавага лесу з дапамогай кнігі Георгія Карцова «Беловежская пуща» (1903 г.), прасачыць яго гісторыю, бліжэй пазнаёміцца з яго насельнікамі — усведамляеш, як шмат табе яшчэ трэба адкрыць нязведанага, непазнанага!

На занятках навучэнцы і студэнты пазнаёміліся з гэтай унікальнай кнігай, папоўнілі свае веды па гісторыі, флоры і фаўне Белавежскай пушчы, даведаліся пра легенды, былі, дзіўныя факты, звязаныя з векавым лесам.

Напрыканцы сустрэчы адбылася віктарына «Открываем для себя Беловежскую пущу». Пераможцам віктарыны была дадзена ўнікальная магчымасць сфатаграфавацца з кнігай Г. Карцова «Беловежская пуща», сапраўднай бібліяграфічнай рэдкасцю. Гэта выклікала ў моладзі шмат эмоцый!

Калі вы яшчэ не наведалі музейна-бібліятэчныя заняткі нашага сектара, распрацаваныя да 85-годдзя Брэсцкай вобласці, спяшайцеся гэта зрабіць!

Сектар рэдкай кнігі

+375 162 57 48 30