У сектары рэдкай кнігі Брэсцкай абласной бібліятэкі імя М. Горкага з 6 лютага 2020 г. пачне функцыянаваць арыгінальная выстава пад назвай «Гісторыя адной кнігі. „Хроніка Еўрапейскай Сарматыі“ Аляксандра Гваньіні (Кракаў, 1611)», прысвечаная гісторыку, літаратару, ваеннаму эпохі Адраджэння Аляксандру Гваньіні і яго гістарычнай працы, даволі вядомай і папулярнай у Рэчы Паспалітай, Расіі, Украіне і некаторых іншых краінах Еўропы ў XVI–XVII стст. Уважлівага чытача могуць зацікавіць не толькі велізарная колькасць гістарычных фактаў, інтрыгуючых звестак, апісанне важнейшых падзей таго часу, але і некаторыя практычныя парады (у прыватнасці па земляробстве ў нашым краі), якія з поспехам можна выкарыстоўваць і сёння.

На выставе будуць прадстаўлены: фрагмент сапраўднага польскага выдання 1611 г. «Хронікі» Аляксандра Гваньіні (кніга 3); твор Гваньіні ў перакладзе на ўкраінскую мову, упершыню цалкам выдадзены ў наш час (Кіеў, 2009), а таксама матэрыялы пра жыццё і дзейнасць гісторыка-храніста.

Праца Гваньіні з’яўляецца неад’емнай часткай гістарычнай і духоўнай спадчыны нашай краіны, яна мае патрэбу ў дэталёвым вывучэнні і гістарычным усведамленні яе ўтрымання.

Казакова Віялена Віяленаўна,

бібліёграф сектара рэдкай кнігі

Кантактны тэлефон: +375 162 57 48 30