|
|
|
Брэсцкая абласная бібліятэка імя М. Горкага |
|
||||||||
Начало активности (дата): 28.11.2019 10:00:59
Количество показов: 848
Узнагароджанне лаўрэатаў Літаратурнай прэміі імя У. А. Калесніка Брэсцкага абласнога выканаўчага камітэта за 2019 г.
26 лістапада 2019 г. у БрДУ імя А. С. Пушкіна адбылося чарговае ўзнагароджанне лаўрэатаў Літаратурнай прэміі імя У. А. Калесніка Брэсцкага абласнога выканаўчага камітэта. У час мерапрыемства ўручылі ганаровыя дыпломы і павіншавалі пераможцаў: намеснік старшыні аблвыканкама Г. І. Барысюк, начальнік галоўнага ўпраўлення ідэалагічнай работы і па справах моладзі аблвыканкама Т. М. Гагакава, начальнік галоўнага ўпраўлення па адукацыі Ю. М. Прасмыцкі, члены савета па прысуджэнні прэміі — дацэнт, кандыдат філалагічных навук У. А. Сенькавец і супрацоўніца Брэсцкай абласной бібліятэкі імя М. Горкага Т. П. Данілюк.
У 2019 г. лепшымі былі прызнаны:
· у намінацыі «Проза» — Сяргей Белаяр за кнігу «Расследаванні інспектара Сарвы»;
· у намінацыі «Паэзія» — Уладзімір Лебедзеў (Ганаровы чытач Бібліятэкі) за зборнік вершаў «Росная трава» і Георгій Тамашэвіч за кнігу «Анёл над Брэстам»;
· у намінацыі «Дзіцячая літаратура» — Анатоль Дэбіш і Васіль Дэбіш за кнігу «Пушчанскія дзівы» і Кацярына Мядзведзева за кнігу «Разламашкі майстра Люфта».
Старшыня Брэсцкага аддзялення Саюза пісьменнікаў Беларусі Таццяна Дземідовіч да ўдзелу ў мерапрыемстве запрасіла супрацоўнікаў аддзела краязнаўчай літаратуры і бібліяграфіі Бібліятэкі. У Брэсцкай абласной бібліятэцы імя М. Горкага сабрана найбольш поўная калекцыя кніг берасцейскіх пісьменнікаў. Да мерапрыемства была падрыхтавана кніжная выстава «Лаўрэаты. Літаратурная прэмія Брэсцкага аблвыканкама імя У. А. Калесніка». Госці і ўдзельнікі імпрэзы мелі магчымасць пазнаёміцца з усімі кнігамі-лаўрэатамі прэміі за 2007–2019 гг.
Бельская Алена Лявонцьеўна,
гал. бібліятэкар аддзела краязнаўчай літаратуры і бібліяграфіі
Лахміцкая Наталля Сцяпанаўна,
бібліёграф аддзела краязнаўчай літаратуры і бібліяграфіі
Кантактны тэлефон: +375 162 57 48 79